أين أسكن في اسطنبول
اسطنبول كبيرة وخياراتها واسعة ومحتار شو تختار؟ قررت تعيش فيها وبدك مكان آمن الك ولعائلتك؟ حاسس انه الموضوع صعب والتفكير فيه متعب؟ خلينا نساعدك لتقدر تلاقي المكان المناسب ويرتاح بالك.. كل ماعليك هو الإجابة على الأسئلة التالية يلي بتعتبر خارطة طريق لتقدر من خلالها تحدد أولوياتك وتختار بشكل دقيق شو هو المكان الأنسب الك للسكن في اسطنبول
رح تسكن لوحدك أو مع العائلة؟
اذا انت شخص وحيد وحابب تسكن لحالك في اسطنبول رح تناسبك شقق من نمط 1+1 (غرفة وصالون) أو استوديو (1+0)، والأفضل انك تبحث بالأبنية الشبابية وتبتعد عن الأبنية العائلية لأنها غالباً رح ترفض تأجيرك لو كنت لوحدك. مناطق السكن الشبابي موجودة بمنطقة الفاتح و أفجلار والمناطق القريبة من الجامعات والسكن الطلابي. أما اذا كنت مع عائلتك فالخيارات أوسع وبتبدأ من شقق من نمط 2+1 لشقق 5+1، والخيار بيعتمد على عدد أفراد الأسرة ومدى حاجتكم للمساحات وتقديركم الها. معظم المجمعات السكنية مابتتجاوز الشقق فيها نمط 3+1 وبتكون أصغر نسبياً من مساحات الشقق في الأبنية العادية. المناطق العائلية كثيرة وأهمها إسنيورت، باشاك شهير، بيليك دوزو ، وزيتون بورنو. وبتختلف فيها الأسعار حسب الموقع والمساحة وعمر البناء وغيرها من المواصفات.
شو هي الميزانية يلي محددها للسكن؟
قبل ماتجاوب هاد السؤال لازم تحط ببالك انه بتركيا في نظام معين عند استئجار الشقق. أول ما تستأجر الشقة رح تدفع مبلغ (تأمين) لصاحب العقار يلي بتكون قيمته أجار شهر أو شهرين في معظم الأحيان. وهاد المبلغ مسترد عند خروجك من الشقة في حال ما كان في أي عطل أو ضرر للشقة. في حال استأجرت عن طريق مكتب عقاري انت بحاجة كمان لتدفع مبلغ العمولة أَو المعروف باسم (كومسيون) وقيمته 12% من الأجار السنوي أو إيجار شهر واحد حسب الاتفاق، وهو مبلغ غير مسترد بيدفع مرة وحدة فقط للمكتب العقاري. قيمة الإيجارات الشهرية بشكل عام في اسطنبول بتبدأ من 250 دولار أمريكي تقريباً بمناطق مثل إسنيورت وافجلار وممكن توصل 3000 دولار بمجمعات مناطق مثل مسلك وباشاك شهير. وسطياً قيمة الإيجار الشهري لشقة من نمط 3+1 بالأبنية العادية بالمناطق العائلية بحدود 400 دولار أمريكي تقريباً.
بتفكر بالإيجار أو بالتملك؟
الإيجار أم العقار.. هو السؤال الأكثر طرحاً فيما يخص موضوع السكن في اسطنبول. ولتقدر تجاوب عليه بطريقة صحيحة لازم تحدد هدفك من التملك العقاري بتركيا أولاً. إذا كان هدفك هو الحصول على الجنسية التركية تذكر أن قيمة العقار لازم ماتقل عن 400 ألف دولار أمريكي، أو بهدف الاستثمار أو السكن بالتالي بننصحك بالاطلاع على السوق العقاري بشكل جيد والاستفادة من المستشارين العقاريين ليساعدوك بالبحث عن السكن المناسب وتقييمه بقيمته العقارية الحقيقية. عموماً السعر التقريبي لشقة سكنية من نمط 3+1 في اسطنبول هو 200 ألف دولار أمريكي تقل أو تزيد حسب المنطقة والمساحة وعمر البناء أيضاً.
وسط البلد أو مناطق الأبراج والمجمعات السكنية؟
إذا كان جوابك هو الخيار الأول نصيحتنا هي السكن في منطقة الفاتح والمناطق القريبة منها يلي تعتبر وسط المدينة ومركز اسطنبول الحيوي القريب من الخدمات العامة والأماكن السياحية ومعالم المدينة الشهيرة، أما لو اخترت الخيار التاني فنصيحتنا هي اختيار مجمعات باشاك شهير وبيليك دوزو. تبعد هي المناطق عن مركز المدينة حوالي 75 دقيقة بالمواصلات العامة و25 دقيقة تقريباً بالسيارة. أكثر المواصفات يلي بتميز السكن بالمجمعات السكنية هو مرونة أسعارها، خدماتها المشتركة للسكان مثل الملاعب الرياضية والمسابح والحدائق ضمن أبنية حديثة مابيتجاوز عمرها 10 سنوات. من الأمور الهامة يلي بتتعلق بالسكن بالمجمعات والأبراج هو وجود مبلغ ثابت بيتم دفعه بشكل شهري مقابل الخدمات المقدمة للسكان، بيختلف المبلغ من مجمع لآخر حسب نوع الخدمات ولكن غالباً مابيتجاوز 50 دولار أمريكي وبتتسمى (العائدات).
رح تستخدم مواصلات عامة أو عندك سيارة؟
المواصلات العامة من الأمور يلي مافيك تستغني عنها باسطنبول حتى لو كان عندك سيارة أحياناً، بسبب الازدحام الدائم بالشوارع الرئيسية وخاصة بأوقات الذروة. والسيارة ممكن تكون حل للمشاوير القريبة والنزهات العائلية. نصيحتنا هي البحث عن سكن قريب من الشوارع الرئيسية المخدمة بالمواصلات العامة قدر الإمكان مثل منطقة أفجلار وزيتون بورنو، لأنه الحاجة الها لا غنى عنها. أما اذا انت من الأشخاص يلي مو مطروحة بالنسبة الهم فكرة استخدام المواصلات العامة أبداً، فيك تختار مناطق مثل كايا شهير وبهشة شهير.
